„Мора да ја прекинете седницата и објаснете зошто амандманите не се заведени и како тоа од над 2.000 амандмани, само 12 се уредни, а останатите не се ниту заведени. Тоа е самовоиле“, рече Апасиев.
Претседавачот со седницата Горан Мисовски мирно реагираше и продолжи да ја води седницата, велејќи дека се раководи од деловникот и дека за секој амандман се оди според процедурата.
Како што се одбиваа амандманите од тие 12 „уредни“ од страна на останатите пратеници во Собранието, реагираше повторно Крмов.
„Прекинете ја седницата. Ескалираше ситуацијата кон опремата, но ќе ескалира и во друга насока. Ние сме избрани не за да молчиме и да користиме привилегии, туку да работиме за народот. Или прекинете, или исфрлете ме, исфрлете нѐ. Викнете обезбедување и сторете го тоа. Ајде тепајте нѐ“, повика Крмов и овојпат настрада еден од микрофоните од пратеничката говорница.
Потоа Крмов се качи зад грбот на Мисовски, фрлаше кон него листови од амандмани и се обиде да му ја земе, можеби електронската картичка. Мисовски не возврати.
Што се однесува до претседателот на парламентот, Талат Џафери како предлагач на нов деловник, седи во пратеничките клупи и се изјаснува дали некој амандман се прифаќа или не.
Инаку, пред инцидентот, Крмов на својот Фејсбук објави: „СДС-ДУИ ќе ги тепаат пратениците на Левица додека ДПМНЕ им прави кворум на седницата“.
Некаде истовремено и Апасиев се беше огласил преку Фејсбук:
„Се спрема финалниот ШВЕРЦЕРАТ во Собранието на Северна! СДС-ДПМНЕ-ДУИ вс Левица. Договорено е и физичко вадење на пратениците на Левица од пленарната сала, само и само да помине Деловникот со кој опозицијата би станала излишна. Епа, ОК. Предизвикот е прифатен. Кад је бал, нека биде маскенбал“.
Во официјално соопштение, објавено во исто време, Левица порача:
„Ја информираме јавноста дека на денешната пленарна седница на Собрание, криминогената широка коалиција СДС-ДУИ-ДПМНЕ се подготвува насилнички, СО ШВЕРЦ БЕЗ ПРЕСЕДАН, да го донесе новиот Деловник!
Иако Левица уредно поднесе над 2.000 амандмани за да спречи носење на штетен и недемократски Деловник со кој се укинува филибастеринг - власта е подготвена брутално да ги прекрши собраниските процедури и да ги угнети пратеничките права! Ваквото насилие е целосно погребување на македонската демократија, а пратениците на Левица се подготвени и ФИЗИЧКИ да го бранат народниот мандат!
